Âfitâb-ı Kubbe-i Kübrâ Muhammed Mustafâ

NA'T-I ŞERÎF

Âfitâb-ı kubbe-i kübrâ Muhammed Mustafâ

Mâhitâb-ı "Leyle-i Esrâ" Muhammed Mustafâ

Mevcûd-i mele-i a'lâ şem'inin pervânesi

'İlm ü 'irfân mahzen-i deryâ Muhammed Mustafâ

Enbiyâlar serveri âhir zemân peygamberi

Gülbün-i gülşen-i "ev ednâ" Muhammed Mustafâ

Hil'at-i "levlâk"i zât-ı pâkine verdi Hudâ

Metn-i neşr-i şârih-i Tâhâ Muhammed Mustafâ

"Ve'd-duhâ" vassâf olup 'ilm-i ezel vassâfına

Münzelâtda memdûh-i Mevlâ Muhammed Mustafâ

Gözlenir rûz-i cezâ bâb-ı şefâ'at fethine

Enbiyâya dergeh-i vâlâ Muhammed Mustafâ

"Lî me'allah" ravzasında şem'a-i nûr-i hüdâ

Ol sebeble kevser-i ma'nâ Muhammed Mustafâ

Çâr-i yâr-i bâ-safâ cân verdi İslâm yoluna

Âb-ı hidâyet ile ihyâ Muhammed Mustafâ

Kıblegâh-ı enbiyâdır mihrâb-ı ebrûleri

Neyyir-i a'zam-ı isti'lâ Muhammed Mustafâ

Kudsiyânın ilticâgâhı ezelden tâ ebed

Melce-i bây u gedâ me'vâ Muhammed Mustafâ

'Arş u ferş levh u kalem bir defteridir vasfının

Câlis-i kürsî-yi istiğnâ Muhammed Mustafâ

Hurşîd-i kubbe-i vahdet nûr-i Hakk hayru'l-verâ

Her dü âlem rahmet-i Mevlâ Muhammed Mustafâ

Kühl-i "mâ zâga'l-basar" zîver-i nûr-i dîdesi

Hâk-i pây-i lü'lü’-i lâlâ Muhammed Mustafâ

Cûd-i vücûdu sebeb bu mevcûdât vücûduna

Hayât-ı dünyâ ve mâ-fîhâ Muhammed Mustafâ

Enbiyâlar evliyâlar muntazır fermânına

Lutfiyâ ezel kerem-fermâ Muhammed Mustafâ

Alvarlı Efe Hâce Muhammed Lutfî

Kaddesallahu Sırrahu'l-Âlî