Cihânın Cânı vü Cânın Muhammed'dir Çü Cânânı

NA'T-I ŞERÎF

Cihânın cânı vü cânın Muhammed'dir çü cânânı

Ki kâtı'dır makâlâtı

Ol ola çünki cânânı nice sevmeye cân anı

Ki sâtı'dır delâlâtı

Odur cânân yaradan cân edindi çün anı cânân

Ki mahcûb etdi zâtına

Sever anı kamu cânân odur bu cânların cânı

Ki câmi'dir kemâlâtı

Odur bu cânların cânı odur serverlerin hânı

Çün ol sultân-ı kevneyndir

Odur gevherlerin kânı o bildi buldu sultânı

Ki sâdıkdır risâlâtı

Odur sultân ki zâtından tecellî etdi zâtına

Hüviyyetden hicâb açup

Getirdi 'ilm-i gaybından zuhûra nûr-i Sübhân'ı

Ki nâtıkdır celâlâtı

Odur Sübhân kim ol nûru musavver etdi 'âlemde

Muzaffer fer müeyyed yed

Ki tâ sırr-ı muhabbetden erişe feyz-i Rahmânî

Ki vasl ede hayâlâtı

Odur Rahmân ki rahmetden getirdi bir kalem evvel

Ola tâ 'ilmine mazhar

Ki yaza adını anın biline 'ilm-i Mennân'ı

Buluna anda hâlâtı

Odur Mennân-ı a'la kim ol ism-i a'zamın resmin

Ki 'unvân etmeğe adın

Getirdi levh-i mahfûzu ki yaza dîn-i Deyyân'ı

Ki def' ede mübâlâtı

Odur Deyyân-ı 'âlem kim getirdi 'arşı bir kubbe

Nitâkında kura hayme

'Urûcunun burûcunda doğa ol şems-i Yezdânî

Ede mâha mübâhâtı

Odur Yezdân-ı 'âlem kim kodu sahnında bir kürsî

Ana vahdet sarâyında

Ki dârü'l-mülküne anın kura eyvân-ı Hannân'ı

Ki ref' ede mekânâtı

Odur Hannân u 'Allâm ol kim eflâkin muhîtâtın

Sala tâ merkeze sâye

Hıyâmın sâyebân etdi ere ta devre devrânı

Tedâvire muhîtâtı

Muhît oldur ki Bâsıt'dır bisât-ı ferşi bast etdi

Ayağı altına anın

Ki sathının firâşında kura tâ 'âlî eyvânı

Dike 'izzetle râyâtı

Çü düzdü işbu nâsûtu erişdi emr-i lâhûtî

Gelüp vahdânî sırrından

Ki bu pergâr-ı vahdetde koya bir nokta insânı

Ona keşf ede subuhâtı

Bu insân sûreti ma'nâ ola tâ kıble-i 'âlem

Çün oldur mazhar-ı Hâdî

Kıla ol kıbleye ikbâl bilen mihrâb-ı rûhânî

Kabûl ola münâcâtı

Çün insân hıl'atın giydi sa'âdet tâcın urundu

Bu cismânî vilâyetde

Binüp pes devlet atına yürüdü tutdu meydânı

Basup 'arzı semâvâtı

Pes andan minber-i 'arşda okutdu adına hutbe

Çü sultân eyledi anı

Kazıtdı adına sikke kurup kürsîde lîvânı

K'ola a'lâ makâmâtı

Buyurdu sancağın eflâk zerâsının verâsında

Yasadı anda Mikâil

Buyurdu indi Cebrâil bile menşûr-ı Rabbânî

Ona vahy etdi âyâtı

"Le 'amrük" tâcını urdu ridâ giydirdi "levlâk"i

Çün ikrâm eyledi ana

Berâtın verdi huccetden nişânın urdu burhânı

Ki zabt ede reâyâtı

Kodu başında bir rıf'at ki farkı geçdi tâ fevka

Geçüp tâk-ı mu'allâdan 

Kodu mecmû'-ı mevcûdât pes ayağına pîşânî

Çü gördüler kerâmâtı

Kodu alnında bir devlet kim onun devletinde halk

Gelüp bu 'âlem-i mülke

Sebeb ol oldu buldular kamu in'âmı ihsânı

Sa'âdâtı siyâdâtı

Kodu kaşında bir hey'et ki sayd-ı kâinât ede

Ki sayyâd-ı Samed'dir ol

Ki kirpikden hadengini atıcak ola kurbânı

Ala cümle beriyyâtı

Kodu gözünde bir san'at ki bir kerre bakışında

Tamâm etrâf-ı âfâka

Görürdü şark ile garbı 'ayân olurdu a'yânı

İmârâtı harâbâtı

Kodu sem'inde bir kudret ki Cebrâil'e emr olsa

Cenâb-ı lâ-yezâlîden

İşitirdi onu derhal bilirdi vech-i Furkân'ı

İşârât u ibârâtı

Kodu yüzünde bir tal'at ki her kim görsedi bir kez

Erirdi gövdede cânı

Sanırdı kim yanağında güneş ederdi seyrânı

Uçardı göğe zerrâtı

Kodu burnunda bir haslet kim ererdi meşâmına

Cemî'-i 'âlemin tîbi

Husûsâ cennet-i 'adnin gelirdi rîh-ı elvânı

Ki mevc ururdu ravzâtı

Kodu dilinde bir hikmet kemâlince belâgatden

Kim ibtâl eyleyüp sihri

Meânînin bedî'inden beyân ederdi tıbyânı

Eda edüp beyânâtı

Kodu kolunda bir kuvvet ki bir kabza gubâr ile

Helâk ederdi ahzâbı

Ne yere sunsa ererdi eriştirirdi dermânı

Savardı andan âfâtı

Kodu sadrında bir kalbi kim ola 'ilmine mahzen

Gelüp gayb ibtidâsından

Akup deryâ-yı hikmetden dökerdi dilde Kur`ân'ı

Biline tâ nihâyâtı

Kodu kalbinde bir nûru kim anın şem'-i pürtâbı

Zıyâsı in'ikâs edüp

Ererdi düpdüz ekvâna kılardı onu nûrânî

Ki 'arşı ferşi cennâtı

Kodu ayağına kuvvet ki tayy-ı mümkinât ede

Ki hem tayy-ı zamân ede

Berâber ola 'arş u ferş geze bu cümle ekvânı

Kim irgüre hidâyâtı

Şu vaktindi bu ma'nîler ki yer yüzündedi ol mâh

Kim ol bedr-i kemâl idi

Kaçan kim göklere çıkdı yüceldi tal'atı şânı

Dahi artdı dirâyâtı

Ne yere kalbi kim erse ererdi kalebi anda

Kim ol sadr-ı celâl idi

Anınçün iki sâ'atde gezüpdü cümle keyvânı

Burâk u berk idi atı

Anınçün bir nefesde ol geçüpdü Beyt-i Makdis'den

Ki maksûdu mukaddesdi

Anınçün bir nazarda ol çıkupdu hadd-i imkânı

Oydu aksâ-yı gâyâtı

Anınçün şer'i a'ladır anın cümle şerâyi'den

Kim oldur seyyid-i 'âlem

Anınçün dîni nesh etdi anın mecmû'-ı edyânı

Ki şâmildir diyânâtı

Anınçün ümmet-i islâmın irerdi kadr-i a'lâya

Hem andan nûr-i Mevlâ'ya

Anınçün himmet a'lâmın yüceltip kurdu seyvânı

Eriştirdi himâyâtı

Anınçün Kibriyâ-yı Zât nikâb açmış idi ana

Cemâlin arz edüp her bâr

Anınçün vâsıl etmişdi cihândan kendüye anı

Koyup mecmû'-ı lezzâtı

Anınçün kendüye anı muhibb ü mahbûb edinmişdi

Ki 'ayn-ı sırr-ı vahdetdi

Anınçün vâcid ü mevcûd olupdu buldu vicdânı

Tevâcüdde vücûdâtı

Anınçün ana bildirdi ki vaslı yeğ firâkından

Ki 'âlemde nazîri yok

Anınçün ana toydurdu k'ol ev bâkî bu ev fânî

Ki tükenmez beliyyâtı

Anınçün işbu 'âlemden sefer kıldı güzer kıldı

Kim ol ev yeğ idi bundan

Anınçün kodu bu mülkü bekâda tutdu evtânı

Niderler bu diyârâtı

Anınçün bahtiyâr etdi ki bu da ihtiyâr etdi

Kim oldur vâcib ü muhtâr

Anınçün ol da emn etdi ki tutdu bu da îmânı

Ki beklerdi emânâtı

Anınçün pîşvâ olur gerü bu cümle insâna

Ki zîrâ seyyidü'l-halkdır

Anınçün irgürür Hakk'a bulurlar vasl-ı Hakkânî

Bile enva'-ı hâcâtı

Anınçün Yazıcıoğlu komuşdur yoluna cânı

Ki kapusunda bir kuldur

Anınçün fânî olmuşdur bilelden işbu 'irfânı

Kılar ana tahiyyâtı

Yazıcıoğlu Mehmed Efendi

Kuddise Sırruh