Ey Şâhid-i Mukaddes Hurşîd-i Âlem-ârâ

NA'T-I ŞERÎF

Ey şâhid-i mukaddes hurşîd-i 'âlem-ârâ
Geysûlerin muhammes ebrûlerin dilârâ

Zülfün teline kıymet olmaz cihân serâser
Neşr eylemiş dü kevne mûyin anber-i sârâ

Ey nûr-i Hakk Muhammed sûre-i "ve'd-duhâ"da
Vasf eylemiş seni Hakk ta'rîf eder Te'âlâ

Âyât-ı beyyinâtda ism-i şerîfin Ahmed
Bütün 'âleme rahmet gönderdi Zât-ı Mevlâ

Bu mevcûdât vücûdu mevcûduna sebebsin
Ey me'haz-i hidâyet ey dergeh-i mu'allâ

Ey sultân-ı selâtîn ey 'âlim-i bevâtîn
Ey hâtem-i risâlet ey matla'-i tecellâ

Ey hurşîd-i şefâ'at gözler seni her ümmet
Ey merkez-i se'âdet senden budur temennâ

Vîrânı ma'mûr eyle mahzûnu mesrûr eyle
Ey ma'den-i hidâyet mürdeyi eyle ihyâ

Bu ümmet-i Muhammed halk olmadan mukaddem
Va'd eyledin şefâ'at şefâ'atin müheyyâ

Esrâr-ı "kâbe kavseyn" kıldı seni mübeşşer
Kerîm ismine mazhar menzil-gehin "ev ednâ"

'İlm-i ezelde sâbit nâm-ı pâkin Muhammed
Ey mahmûd-i Te'âlâ 'indallah kadri vâlâ

Biz ümmet-i Muhammed şöhretiyle halk olduk
Bu nâmı bizden alma mübeşşer-i "fe terdâ"

Lutfî kapunda el-yevm bir bende-i 'alîldir
Ey menba'-ı merâhim merhametindir ibkâ

Alvarlı Efe Hace Muhammed Lutfî
Kaddesallahu Sırrahu'l-Âlî