Her Derdine Dermân Olur Ey Nûr-i Dil Her Dü Serâ

NUTK-İ ŞERÎF

Her derdine dermân olur

Ey nûr-i dil her dü serâ

Eyle salât ile selâm

Destin tuta Hayru'l-verâ

Yüz tut Cenâb-ı Ahmed'e

Var dergeh-i Muhammed'e

Mâlik ol bâkî devlete

Kabûl eder Bârî Hudâ

Kesret ile eyle salât

'İnd-i Hudâ bul derecât

Salât kabûl-i münâcât

Salât olur derde devâ

Enbiyâya ver salavât

'İnd-i Hudâ al derecât

Evliyâ ile bul hayât

Şerî'ate kıl iktidâ

Feyz-i salât ile vâr ol

Âl-i Muhammed'e yâr ol

Nûr-i hidâyete gâr ol

Dilde doğa nûr-i hüdâ

Dilden bırakma tevhîdi

Tevhîdle eyle tahmîdi

Nûr-i îmânın tecdîdi

Tevhîd iledir ihtidâ

Lutfî Muhammed Mustafâ

Hasan Hüseyin Mürtezâ

Hem çâr-i yâr-i bâ-safâ

Sâhib-i mâkâm-ı 'ulâ

Alvarlı Efe Hâce Muhammed Lutfî

Kaddesallahu Sırrahu'l-Âlî