Ol Cihânın Fahrinin Sırrına Kurbân Olayım

NA'T-I ŞERÎF

Ol cihânın fahrinin sırrına kurbân olayım

Hutbe‐i "levlâk" inen şânına kurbân olayım

"Kâbe kavseyni ev ednâ"sına kurbân olayım

Ben anın 'ilm ile 'irfânına kurbân olayım

Ben anın esrâr‐ı mi'râcına kurbân olayım

Ol Ebûbekr ü Ömer Osmân Alî dört yârıdır

Ol risâlet bağının anlar gül‐i gülzârıdır

Cümle ashâb hidâyet râhının envârıdır

Ben anın âline ashâbına kurbân olayım

Ben anın ashâb ü ahbâbına kurbân olayım

Ol Hasan hazretlerine zehr içirdi eşkiyâ

Hem Hüseyn oldu susuzlukdan şehîd‐i Kerbelâ

İkisidir asl ü nesl‐i cümle âl‐i Mustafâ

Ben anın âline evlâdına kurbân olayım

Ben anın evlâd u ensâbına kurbân olayım

Cümle ümmetden hayırlıdır o şâhın ümmeti

Ümmetine cümleden artuk eder Hakk rahmeti

Enbiyâ anınla buldu bunca lutf u 'izzeti

Ben anın lûtfuna ihsânına kurbân olayım

Ben anın envâ'‐ı eltâfına kurbân olayım

Her ne denlü enbiyâ vü mürselîn kim geldiler

Ümmeti olmaklığı Hakk'dan temennî kıldılar

Evliyâ ana Niyâzî kul u kurbân oldular

Ben anın ayağının tozuna kurbân olayım

Yoluna gidenlerin izine kurbân olayım

Niyâzî Mısrî

Kuddise Sırruh