Sînemdedir Ol Dâğ-ı Temennâ-yı Muhammed

MUHABBET-İ MUHAMMEDİYYE

Sînemdedir ol dâğ-ı temennâ-yı Muhammed

Gönlümdedir ol nâr-ı tevellâ-yı Muhammed

Ağyâr elemi kalmadı aslâ ki dilimde

Her lahza gezer fikr-i dilârâ-yı Muhammed

Her lahza kılar gönlümü reşkâver-i 'anber

Efkâr-ı dü gîsû-yı semensâ-yı Muhammed

Eltâf-ı Hudâ'dır verir îmân-ı hakîkî

Dildâdelere zülf-i çelîpâ-yı Muhammed

İsrâda salup velvele mülk-i melekûta

Reftâr-ı şîrin kâmet-i bâlâ-yı Muhammed

Eyyâm u leyâlî heme sergeşte vü hayrân

Reşkzede-i Leyle-i İsrâ-yı Muhammed

Tâ rûz-ı ezel gönlümü şeydâlığa salmış

Güldeste-i ruhsâre-i hamrâ-yı Muhammed

Birdir gece gündüz bana zîrâ ki serimde

Oynar heme dem berk-i tecellâ-yı Muhammed

El-minnetü lillâh menem rûz-ı ezelden

Pervâne-i esmâ-yı müsemmâ-yı Muhammed

Ser-halka-i rüsvây ü ser-hayl-i cünûnem

Tâ kim olubam 'âşık-ı şeydâ-yı Muhammed

Ey Mîr Nigârî bana mahsûs u müsellem

Ser-hizmet-i meyhâne-i sevdâ-yı Muhammed

Açmış ki şîrin tab'ımı tûtî gibi söyler

Evsâf-ı leb-i la'l-i şekerhâ-yı Muhammed

Seyyid Hamza Nigârî

Kaddesallahu Sırrahu'l-Âlî